食生前我有高血壓的,上壓長期是140-150, 下壓長期是90-95. 媽咪話可能因為佢生我嗰陣緊張導致, 但真正原因係同飲食有關.
食生前 (平均血壓 150, 95) 我最常食既係肥豬肉, 煲湯肉唔肥唔食, 豬扒要有骨同肥肉先食,半 肥瘦义燒, 燒腩仔皮同肉之間必定要有肥肉, 炒粒粒要加肥豬肉炒, 牛腩要有肥羔先食, 打邊爐要有肥牛;
早餐一係唔食, 一係食早餐A, 即係豬扒公仔麵+炒蛋+奶油多+凍0茶, 有時會食M記珍寶早晨全餐 ; 午餐通常係碟頭飯或者燒味飯, 粟米肉粒飯多汁、枝竹火腩飯多汁、炸雞脾飯多色、义雞飯多蔥油、葡國雞飯至愛, 但必定要多汁, 豉椒排骨炒河兜亂、厦門炒米加兩隻煎蛋、西炒飯加兩隻煎蛋、蔥油义燒炒滑蛋飯、燴牛脷飯多汁、大X樂焗豬等等; 下午茶必定係流心芝士西多士, 餐蛋公仔麵+凍0茶, 晚餐有時會煮番茄薯仔炆牛肋骨, 但我只會食牛肋骨, 豉油雞, 煎雞翼, 兩隻荷包蛋就梗架啦, 煎或者蒸魚. 叫 Pizza 必定係 meat lover, 炸雞啦, 魚生壽司都係至愛.
有無發現? 係完全無綠色, 無菜, 無水果.
食生後 (平均血壓 110, 80) 我最常食香蕉、番薯葉、菠菜、油麥菜、青瓜、橙、牛油果、奇異果、杏仁、腰果、紫菜、海帶芽、, 翠肉瓜、粟米、紅蘿蔔、跟時令食西瓜、柑、桑椹、荔枝、芒果、雪梨、杮、木瓜等
我好誠實既, 有時真係忍唔住, 尤其係出街食, 會叫西多士同食海鮮, 真係無得揀會食雞. 牛幾年前戒了, 羊不嬲我麻麻地, 豬都近乎全戒了, 係有時有啲肉碎, 例如喺酒樓食碗生炒糯米飯又懶得挑走啲豬肉. 鴨同鵝我又係麻麻, 以前最鍾意食雞, 幾乎日日都會食, 宜家可能兩至三星期食一次.
